ČAKAVSKA RIČ - Berezina Matoković Dobrila, „Moja pisma“

mojon materi

Dobrila 
 
------------------------------

Moja pisma

 

Ajme
poza pižolota
jušto san raščenila joči ustajen
u livo rastrčali se vali
i šapjedu meljedu o podanka
slanidu sike ribumbaje pina
svitlidu stine ka zvizde
moš mislit
nima lipšega mista na svitu
 
s bande ščipjedu me gropi
brnistra i bori zero kapar
raspucala smokva i điran
razvirđinano žalo
su bokun smija
 
smrdin
o puste lavure pota
šoto paze o verdure ka blitve
korjandula rogači masline
joli o lavande ružmarina
o ribe svi vrsti
raščenuti just
 
jurcadu šetimane
di je agava čičak drača
tot san se zadila
i ližen nabotene žnjute
ježuri
 
poton
projde đir straja
u karoci langvido
mirin vale buže
 
oooj lipote
enti godišč trčedu prez stat
leuti burdižajedu
ladi me bavižela maestral
bižin iz kvadra
 
načičkana mista brodi
fjori o judi
šijaju bile kosti kano jidra
čaš višje
ne moredu lambrit
ča joko zapasa
ča dušu tišči
ča tilo sapinje
i ripje u naman
 za dicu prikodosta
 
vitar me rasipje
jerbo oču
jerbo mi se tilo
reful za refulon cimentaje cime
i priti pripada vazimje
 
a morete ponit šaku sladora
zero milenja
ma sve ništa
jerbo nisi ovod utonija
jerbo ovod ne zgaraš u sudnji mot
ne čaraš ka čejade
refajte za sve
 
opri se zemjo
u tijo
razmejana
razvicjana
bosa
bisna lipa joli zla
sve u jenu teču
 
cipa škina kolino
bodu kantuni
odozada odosprida
vatan riči
ke kreanca
 
fermajte za Gospu
nisan špjegala ni podan zdile
a zovedu me
DALMACIJA